إيمي سمير غانم

كشفت الفنانة المصرية إيمي سمير غانم عن شخصية تتمنى تقديمها خلال مسيرتها الفنية، كما تحدثت عن أفلام زوجها الفنان حسن الرداد، وذلك خلال المؤتمر الصحفي الذي أُقيم اليوم ضمن فعاليات مهرجان الأقصر للسينما الإفريقية.

إيمي سمير غانم تكشف عن رأيها في حسن الرداد 

وقالت إيمي سمير غانم في تصريحات يرصدها تحيا مصر: حسن معملش أفلام كتيرة، وفيلم زنقة ستات استمتعت به كتير، وباقي الأفلام حلوة، وأنا في الكوميدي بحب أتفرج على سهير البابلي الله يرحمها هي رقم 1 بالنسبالي، ونفسي أقدم شخصية صعيدية.

تصريحات حسن الرداد 

فيما قال حسن الرداد: كنت بشوف تاريخ السينما وكنت حابب أكون متنوع، ولما اشتغلت في الاحتراف محبتش أكون محصور في أدوار الجد فقط، وكنت حابب أعمل حاجة رومانسية لأن السينما لو حصروك في مكان هيسيبوك فيه، فا الحمد لله نوّعت ولقيت الناس قابلة ده، والكوميديا أقرب حاجة ليا، وكان في بيني وبين إيمي كيميا حلوة جدا في أعمالنا سوا.

حسن الرداد يتحدث عن والدته

وتابع حسن الرداد عن والدته الراحلة: أمي أثرت في تربيتي ووالدي أيضا، واحترامي للست ده راجع من أمي وتصرفاتي الكويسة دي راجعة من حبي ليها، والفضل بعد ربنا يرجع ليها، ولما جت فترة مش حابب أمثل هي وقفت جنبي وسندتني.

هذا وقال حسن الرداد: سمير غانم بغض النظر أنه حمايا، هو أسطورة كبيرة من الكوميديا وعامود من الاعمدة اللي شالت السينما على كتافها، وسمير كان له مدرسة كبيرة في الكوميديا ومدرسة الارتجال اللي كان الأول فيها.

وتابع، وكان يبان إنه بيعمل حاجة بسيطة ولكنها في غاية الصعوبة، وكانت كوميديا راقية وتليق بكل الناس، وعنده قدرة لو عمل مشهد واحد في فيلم ممكن تنسى الفيلم كله بس تفضل فاكر مشهده هو، زي في فيلم عالم عيال عيال، كان بيحكيلي إن رشدي أباظة كان بيموت على نفسه من الضحك ويعيديوا المشهد كتير، وكان ليا حظ إني اشتغلت معاه.

وأضاف حسن الرداد، اتعلمت منه حاجات كتيرة زي قد إيه مهم إنك تكون صادق مع الناس وتكون مكبر دماغك، وبتقدم حاجات حلوة وتفضل باقية مع الناس وده شوفناه فعلا الحب الكبير له عند الناس، هو مأثر في أجيال كتير جدا وتحس كل واحد فينا جواه سمير غانم صغير، عشان اتربينا على حاجاته وهو متوغل جوانا كلنا.

هذا وقالت إيمي سمير غانم عن والدها: هو فعلا كان معندوش مشاكل مع حد وأنا ودنيا ومامي واخدينها عنه الحتة دي، مش بنعمل مشاكل حتى لو حد بيأذينا مش بنرجع نرد أو نقول حاجة، وبسمع كتير لحد دلوقتي حب الناس وكل الأجيال بتفضل تدعيله وإنه أجمد كوميديان، وأنا كدة كدة فخورة وبابايا عندي حاجة كبيرة أوي.