القلق مبرر ومشروع.. والظروف الصعبة موجودة منذ سنوات

الإثنين 06/يناير/2025 – 08:36 م

قال الرئيس عبد الفتاح السيسي رئيس الجمهورية، إن القلق مبرر ومشروع والظروف الصعبة موجودة من سنوات، ولكن إحنا في مصر عندنا حاجات كتير يمكن مش واخدين بالنا منها، وهي إننا عارفين إن فيه رب.

السيسي: تابع كل الأمور وبشوف كل ردود الأفعال

وأضاف الرئيس عبد الفتاح السيسي، خلال زيارته مقر كاتدرائية ميلاد المسيح بالعاصمة الإدارية الجديدة: كل عام وأنتم طيبين، وقداسة البابا بخير وسلام، وإحنا كلنا إن شاء الله بخير وسلام، واحنا كمان بنحبكم وأنتم إخواتنا وحبايبنا.. وبنتعامل مع الأمور بشرف وأمانة ونزاهة.

وتابع: إن شاء الله عام سعيد، وسنة إن شاء الله تبقى بفضل الله سبحانه وتعالى أفضل من السنوات الماضية، وبتابع كل الأمور وبشوف كل ردود الأفعال، والقلق يمكن يكون مبرر، ولازم تعرفوا، ومش بكلمكم أنتم بس، بكلم الدنيا في مصر وبرا مصر من خلالكم، إن شاء الله السنة دي تبقى أفضل من السنوات اللي فاتت.

وتابع: يمكن حد ينسى مع الظروف ويتهيأله إن الأمور مش ممسوكة كده، مش بينا إحنا البشر، لا برب البشر، الدنيا مش متسابة كده، احنا مؤمنين بالله كلنا صحيح لكن مش عاوزين ننسى، لازم كلنا نبقى متأكدين من النقط دي، ولازم كلنا نعرف إن ربنا موجود، ومحدش يقدر يعمل أي حاجة في الوجود اللي احنا فيه ده إلا بأمر الله سبحانه وتعالى.