كان بيبلطج علينا وبيهددنا.. ننشر نص تحقيقات المتهم الأول بإنهاء حياة صديقه في الطالبية

الأربعاء 08/يناير/2025 – 06:17 ص

يستكمل القاهرة 24 نشر نص تحقيقات المتهم الأول بقتل صديقه في حي الطالبية، بالاشتراك مع شقيقه، إثر مشاجرة نشبت بينهم.

نص تحقيقات قضية مقتل شاب الطالبية

واستمعت جهات التحقيق لأقوال المتهم الأول بقتل شاب الطالبية، وجاءت كالآتي:- 

س: متى وأين حدث ذلك؟

ج: الكلام ده حصل يوم السبت الموافق 21/12/2024 حوالي الساعة 3:30 العصر في شارع كمال الجرحي المتفرع من شارع المستشفى فيصل الطالبية.

س: من كان برفقتك آنذاك؟

ج: أخويا.

س: ما سبب تواجدك بالمكان والزمان سالفي الذكر؟

ج: كنت في محل أكل عيشي وهو محل حلاقة بتاعي أنا وأخويا.

س: ما طبيعة علاقتك بالمتهم س.أ؟

ج: يبقى أخويا الصغير.

س: ما علاقتك بالمجني عليه م.ع وهل من خلافات فيما بينكما؟

ج: هو كان زبون بيحلق عندنا بس، وكان بيتعامل معانا أنا وأخويا في كل حاجة بالبلطجة والتهديد.

س: وما هي بادرة لقاءك بالمجني عليه يوم الواقعة؟
ج: اللي حصل إن أنا كنت شغال في المحل بتاعي، ولقيت محمد علاء المجني عليه واقف قدام المحل بتاعي، وكان ماسك زجاجة خمرة في إيده وبيشرب منها، وأنا لما شوفته طلعت من المحل بتاعي وقولتله يا محمد روح اشرب بعيد عن باب المحل علشان ده محل أكل عيش، وكده مش هيجيلي زباين غير ناس شبهك، راح هو قايلي يعني إيه شبهك دي وزقني وشدينا مع بعض وفضل واقف قدام المحل، وأنا سبته ودخلت أكمل شغلي وبعدها ببص على الباب لقيته مشي من قدام المحل.

وأضاف المتهم الأول بقتل شاب الطالبية في التحقيقات: على الساعة 9 بالليل في نفس اليوم لقيت محمد علاء رجع عند المحل ثاني وكان معاه صاعق في إيده، وكان في الوقت ده سامي أخويا كان بيجيب حاجة من الشارع ولسه راجع، وهو داخل المحل علشان نكمل شغلنا راح محمد علاء كهربه بالصاعق في رجله، راح سامي قاله إنت بتعمل إيه يا محمد احنا مش هنلعب، ومفيش ما بينا تهريج وسابه ودخل المحل وهو زعلان، ومحمد علاء مصمم يهزر معاه وراح كهربه تاني في صدره داخل المحل، راح سامي شتمه وقاله اطلع بره یاض وزقه، راح محمد علاء شتمه.