زيزو من رموز الزمالك.. ولا تعقيب على حديث الجزيري

الجمعة 27/ديسمبر/2024 – 11:50 م

تحدث أحمد سالم، المتحدث الرسمي لنادي الزمالك، عن العديد من الملفات التي تخص قطاع كرة القدم للفريق الأول. 

تصريحات أحمد سالم المتحدث الرسمي للزمالك 

وقال سالم في تصريحات تلفزيونية: العتاب على سيف الدين الجزيري إنه بيعلم مشاكل الزمالك المادية وإن الموضوع لا يخصه فقط، فيه مستحقات متأخرة لكل لاعبي الفريق. 

وأضاف: معنديش تفسير لحديث سيف الجزيري عبر إنستجرام لكنه بالتأكيد عارف ظروف النادي كويس، والإدارة شغالة على حلها، بكل وضوح الأولوية لمجلس إدارة نادي الزمالك حاليا هو دفع المستحقات المتأخرة لكافه اللاعبين ثم تجديد العقود. 

وواصل: الزمالك بيواجه أزمة مالية كبيرة الفترة دي، وبنقدر إن اللعيبة مستحملة معانا، لما الفلوس تتوفر محدش هيبخل بيها على الفريق، مجلس الإدارة يضع مستحقات اللعيبة أولوية، وبعدها هيبقى التجديد للاعبين اللي عقودهم بتخلص، وبعد كدة نشوف الاحتياجات الفنية لو متوفر. 

وأردف متحدث الزمالك: الالتزامات أكبر بكتير من المصروفات، لو شيلت الغرامات أو الفلوس اللي الإدارة ملهاش ذنب فيها، واللي وصلت لـ 6 ملايين دولار، وقتها كانت الأمور هتبقي أفضل بكتير. 

واستطرد: فيه لعيبة كبار عقودهم هتنتهي بنهاية الموسم مش عارف ليه كل الكلام على زيزو، في لعيبة تانية كبيرة محتاجه تجدد، زي عمر جابر والونش، إن شاء الله ربنا ييسر الصعب، قريب جدا الأمور هتبقى أفضل كتير، وزيزو رمز من رموز الزمالك وملف تجديد العقود ضمن أولويات مجلس الإدارة بعد سداد المستحقات.